ఆలస్యంగా నేను తెలుసుకున్న ఒక విషయం…

చిన్నప్పటి నుంచే నాకు బంగారం మీద పెద్దగా ఆసక్తి, మోజు ఎప్పుడూ లేదు.

అందుకే ఏ సందర్భంలోనూ బంగారు నగలు ధరించాలి అన్న ఆలోచన కూడా నాకు రాలేదు.

నిజం చెప్పాలంటే, నా జీవితంలో నేను చాలా అరుదుగానే బంగారు నగలను చేతితో తాకి చూసాను.

సమాజంలో ఇతరులను ఇంప్రెస్ చేయడానికి, fake social status పొందడం కోసం

బంగారు నగలు ధరించాలి అన్న భావన నాకు ఎప్పుడూ లేదు.

అందుకే బంగారం గురించి నేను పెద్దగా ఆలోచించలేదు.

కానీ ఈ సంవత్సరం ఆగస్టు నెల నుంచి బంగారం ధరలు వేగంగా పెరుగుతుండటం గమనించినప్పుడు,

మొదటిసారిగా బంగారాన్ని ఆభరణంగా కాదు — ఒక పెట్టుబడిగా చూడటం ప్రారంభించాను.

---

సెప్టెంబర్ 19న, దక్షిణ భారతదేశంలో మొదటిసారిగా బెంగళూరులో ప్రారంభమైన Apple అధికారిక స్టోర్‌లో, iPhone 17 విడుదలైన మొదటి రోజునే కొనాలి అన్న ఉద్దేశంతో నేను బెంగళూరుకు వెళ్లాను.

కానీ నాకు కావాల్సిన మోడల్ స్టాక్‌లో లేకపోవడంతో, iPhone 17 కొనకుండా తిరుపతికి తిరిగి వచ్చాను.

YouTube లో కొంతమంది ప్రసిద్ధ ఫైనాన్షియల్ అడ్వైజర్లు iPhone గురించి మాట్లాడేటప్పుడు,

“ఖరీదైన iPhone కొనేసి 2-3 సంవత్సరాలు ఉపయోగించడం కంటే, అదే డబ్బును Apple స్టాక్స్‌లో పెట్టుబడి పెట్టండి. ఫోన్ కొనడం ద్వారా డబ్బును ఖర్చు చేయడం కంటే, మీ డబ్బును పెంచుకోండి” అని చెబుతుంటారు.

అది విన్న తర్వాత, ఒక చిన్న ప్రయోగంగా నా జీవితంలో మొదటిసారిగా, సెప్టెంబర్ 25న ₹42,000ను SBI Gold Fund‌లో పెట్టుబడి పెట్టాను.

సెప్టెంబర్ 30న, SBIలో పనిచేస్తున్న నాకు బాగా పరిచయం ఉన్న ఒకరు, తాను కట్టుకుంటున్న కొత్త ఇంటి నిర్మాణానికి డబ్బు అవసరం వచ్చినప్పుడు

అప్పుగా నేను ఇచ్చిన ₹2 లక్షలను తిరిగి ఇచ్చారు.

ఆ డబ్బును ఎక్కడ పెట్టుబడి పెట్టాలి అని ఆలోచిస్తున్న సమయంలో,

బంగారం ధరలు వేగంగా పెరుగుతున్నాయని గమనించాను.

అందుకే ₹2 లక్షలకు తోడు ₹8,000 జోడించి,

అక్టోబర్ 1న మళ్లీ SBI Gold Fund‌లో ₹2,08,000 పెట్టుబడి పెట్టాను.

ఇంతకుముందు పెట్టిన ₹42,000తో కలిపి, నా మొత్తం పెట్టుబడి ₹2.5 లక్షలు అయింది.

కేవలం 20 రోజుల్లోనే, అక్టోబర్ 20న, నా ₹2.5 లక్షల పెట్టుబడికి దాదాపు 10% — అంటే సుమారు ₹25,000 లాభం వచ్చింది.

తర్వాత బంగారం ధరలు కొంచెం తగ్గడంతో, లాభం కూడా తగ్గింది.

ఈ నెల ప్రారంభంలో మళ్లీ నా పెట్టుబడి 10% లాభాన్ని చేరుకున్నప్పుడు,

“వచ్చిన లాభాన్ని తీసుకుందామా?” అన్న ఆలోచన నాకు వచ్చింది.

అతి కొద్ది సమయంలో 10% రాబడి రావడం నాకు చాలా పెద్ద విషయంగా అనిపించింది.

ఈ విషయాన్ని కొంతమంది స్నేహితులతో చర్చించగా, వారు లాభం తీసుకోకుండా కొనసాగించమని సూచించారు.

---

అమెరికాలో బంగారాన్ని ouncesలో కొలుస్తారు.

1 ounce = 31 గ్రాములు.

అక్కడ బంగారం ధర ఒక ounce‌కు సుమారు $4,500 వరకు చేరింది — ఇది ఇప్పటివరకు ఉన్న అత్యధిక స్థాయి.

దీని ప్రభావంతో భారతదేశంలో కూడా బంగారం ధరలు కొత్త All-Time Highలను చేరాయి.

మనలో చాలా మంది 22 క్యారెట్ బంగారం ధరలనే గమనిస్తుంటారు.

కొన్ని రోజుల క్రితం 22 క్యారెట్ బంగారం ధర గ్రాముకు ₹12,500 చేరింది.

మరుసటి రోజు ఒక్కరోజులోనే గ్రాముకు ₹270 పెరిగి ₹12,770ను తాకింది.

బంగారం ధరలు ఇలా పెరగడానికి కారణాలు చూస్తే —

• 2026లో అమెరికా Federal Reserve వడ్డీ రేట్లు తగ్గించవచ్చనే అంచనాలు

• పెట్టుబడిదారులు బంగారం వైపు మళ్లడం

• ప్రపంచ దేశాల కేంద్ర బ్యాంకులు బంగారం కొనుగోలు పెంచడం

• భారత రూపాయి డాలర్‌తో పోలిస్తే బలహీనపడటం

ఇవి అన్నీ కలిపి బంగారం ధరల పెరుగుదలకు కారణాలు.

2030 నాటికి అమెరికాలో బంగారం ధర ఒక ounceకు $10,000 చేరవచ్చని కొంతమంది నిపుణులు అంచనా వేస్తున్నారు.

అది నిజమైతే, భారతదేశంలో 8 గ్రాముల బంగారం ధర ₹3 లక్షలకు చేరే అవకాశం ఉంది.

ఇప్పటివరకు 7% వడ్డీ ఇచ్చే FD, PPF వంటి పెట్టుబడులపైనే దృష్టి పెట్టిన నేను,

చాలా ఆలస్యంగా బంగారం విలువను అర్థం చేసుకుంటున్నాను.

ప్రస్తుతం నా ₹2.5 లక్షల పెట్టుబడి విలువ ₹2,90,800కి చేరింది.

రాబోయే కొత్త సంవత్సరంలో బంగారంలో ఇంకా ఎక్కువగా పెట్టుబడి పెట్టాలని నేను నిర్ణయించుకున్నాను.

ఈ బ్లాగ్ రాయడానికి నా ఉద్దేశం ఒక్కటే —

ఈ జనరేషన్ వారు బంగారాన్ని కేవలం ఆభరణంగా కాకుండా, ఒక మంచి పెట్టుబడిగా కూడా చూడాలి.

---

తిరుపతి మహేష్

24/12/2025